文章日期：09/15/2010 08:07 pm
聽我講故（8）登龍街17號
我住喺17號三樓，係一梯兩單位，即係17號同19號共用一條木摟梯。住喺對面19號三樓只得一伙人，可能只係住咗三、四個人，嗰時，我覺得呢家人係有錢佬嚟嘅！喺我眼中，佢哋唔只衣着乾淨整齊，佢哋仲有一架福士甲蟲。我一生人第一次坐嘅私家車，好可能就係呢架。
係咁嘅，有一次，我哋返鄉下﹔嗰時要帶好多嘢，一大袋餅干、布、鹵咗嘅豬肉、油、煙仔……﹔總之帶得嘅日用品。嗰時冇紅白藍，而係用大麻包袋。仲有，要倒塔咁早就起程。不知如何，啊爸情商咗呢位鄰居，佢義務車我哋一程。我估計，佢應該係送我哋去中環天星碼頭，然後我哋搭船去尖沙咀再搭火車返大陸。我嘅處男私家車旅程，我記得嘅喺三件事﹕架車開得快、四圍黑麻麻、同埋唔駛理紅燈！
呢家人有一對仔女，大我五年左右，嗰仔叫做〝架頭〞，個女？唔記得。仲有兩段歷使同佢哋有關嘅﹕
我有時過隔離佢哋屋企嘅。有一次，嗰女問，「點解汽水攞咗出嚟（佢哋仲有雪櫃𠻹！），個樽外邊會濕嘅？係咪啲汽水走咗出嚟？」我話，「唔係噃，先生話，因為個樽凍，外邊啲空氣掂到個凍樽，就會變水喇！」架頭話，「你睇你幾蠢，連小學生都識，你都唔識！」我嗰時應該唔夠五年班啩。
到我小學畢業時（我已經搬咗），考升中試但派唔到位。啊爸叫架頭帶我去報私校，就係佢介紹，我喺 1968年9月，入讀跑馬地山光道一號，香港英文書院。佢仲帶我去波斯富街一間餐廳（美香園涼茶鋪隔離）食午餐。呢次應該係我第一次食西餐！我印象係餐廳唔夠光，同埋架頭教我點樣飲湯。
講番屋企。因為樓梯黑，我唔敢一個人上樓，成日喺樓下等有人上樓可以跟埋一齊上。不過如果等唔到人嘅話，就博命快跑上樓。所以唔敢係樓梯逗留得太耐，因此完全唔知道二樓同四樓其他嘅人與事。
17號地下係一個紙倉，而家諗番起，可能係一個收買廢紙嘅舖頭。我啊爸成日担心，如果呢度火燭就大鑊嘞！
每當盂闌節時，我哋樓下就開壇，壇上擺咗香燭，三牲、水果……等祭品，旁邊有幾個紙紥公仔企响處。二摟騎樓外面掛咗個大花牌，同酒樓外面嘅擺酒花牌一樣。花牌上有〝盂蘭勝會〞四個字（我啊爸成日笑有人將佢讀成〝孟簡籐曾〞）。街邊亦擺咗一個燒到生晒銹嘅燒衣鐵皮屋仔，成日都有人攞啲祭品嚟火化。
實在盂蘭節期間，呢度非常熱鬧。家家户户都攞衣紙祭品，到街邊去〝燒街衣〞。我哋嗰時一啲都唔覺得恐佈，反而覺得好好玩。啲細路仔連群結隊四圍去睇人燒街衣。對細路嚟講，燒街衣嘅高潮係撒錢！我哋會一路行一路叫（當然小心比人追打），「燒衣唔撒錢，今晚比鬼〝鍊〞」。即係等於鬼佬Halloween嘅trick or treat啫。啲人燒完衣就會將啲斗零、一毫等碎银撒入火堆，細路就會爭住嚟執。唔駛驚，我哋會執生，唔會燒親自己嘅。啲細路繼續四圍行，見到燒過衣紙嘅地方，就用腳踢走灰燼，揾吓仲有冇銀仔執。
實在盂蘭節期間，呢度非常熱鬧。家家户户都攞衣紙祭品，到街邊去〝燒街衣〞。我哋嗰時一啲都唔覺得恐佈，反而覺得好好玩。啲細路仔連群結隊四圍去睇人燒街衣。對細路嚟講，燒街衣嘅高潮係撒錢！我哋會一路行一路叫（當然小心比人追打），「燒衣唔撒錢，今晚比鬼〝鍊〞」。即係等於鬼佬Halloween嘅trick or treat啫。啲人燒完衣就會將啲斗零、一毫等碎银撒入火堆，細路就會爭住嚟執。唔駛驚，我哋會執生，唔會燒親自己嘅。啲細路繼續四圍行，見到燒過衣紙嘅地方，就用腳踢走灰燼，揾吓仲有冇銀仔執。
真係好懷念呢啲日子。
繼續講登龍街。
留意下一篇
No comments:
Post a Comment