聽我講故（7）夜來香
上一篇提及廚房裹面滿載問題嘅木桶。係因為舊時啲屋多數都冇排污系统，要解决呢啲出口問題，屋企嘅木桶只係臨時貯存嘅地方。最終都係要有人攞去倒嘅，所以市政局就安排逐家逐户將呢啲問題攞走。如果日光日白去做，咁唔係幾好嘅！夜晚出動就會好啲，而呢啲問題嘅味好…….〝香〞嘅，所以稱之為〝倒夜香〞嘞，又因為多數都係女人做嘅工作，所以叫做夜香婆。點解唔係夜香郎？我諗，夜孖孖，一個陌生男人穿堂入室，始終都係唔方便嘅。
流程係咁嘅：一架綠色嘅車，好似一架縮水運電油車，即係有個瞓低嘅大圓筒嗰隻車。車尾有三、四個洗嘢嘅水槽。有一個由車尾伸出離地約1呎嘅企台，應該可企三、四個人。倒夜香車停喺街，夜香婆攞住两個空木桶，上樓梯先去頂樓﹔舊樓最高四層。夜香婆拍門，邊有電門鐘吖。嘭嘭嘭！「倒夜香呀！」佢大嗌。半夜呀大佬。開門，夜香婆入屋，直踩問題所在之處。拎起屎桶，倒落佢帶嚟嘅木桶，揪起走人，落樓返去夜香車，交個桶比企喺車尾個人，呢個係男人，係夜香郎，佢拎起桶嘢，倒哂落車度，再略為清潔木桶，交返木桶比夜香婆，然後再向另一個單位出發。
我啊爸講咗一個同倒夜香有關嘅故事比我聽，故事係咁嘅：
喺毛主席企喺天安門城樓上，宣佈「中國人民從此站起來了」嘅半年前，喺香港一幢戰前舊樓內，有一家人有個男嬰啱啱出世，呢一分喜悅，勉強可以掩蓋少許不久前喪失愛女之痛。一晚，大家都瞓得好稔，忽然間，大門傳來……砰砰砰！大力拍門。「倒夜香呀，點解冇人開門，冇晒人呀？係咪死哂呀？」夜香婆喺門外大叫。可怒也，啱啱有細路仔出世，講埋啲咁唔〝老利〞嘅嘢。個男人嬲起上嚟，即刻起身落牀，去門口打開大門，睇都唔睇就兜腳伸落夜香婆度。夜香婆冷不防突然攻擊，連人帶屎桶，由三樓骨碌骨碌滚落二樓……。
結局係點呢？夜香婆傷成點？個男人有冇比差人拉呢？一切一切啊爸都冇話過我知。相信會成為宇宙永恆的祕密。
跟住我會講吓我細個時嘅登龍街。
留意下一篇。
No comments:
Post a Comment