聽我講古（3）來自何方 - 母系（1）

聽我講古（3）來自何方 - 母系（1）

文章日期：08/31/2010 08:49 pm

聽我講故（三）來自何方 - 母系（1）

講到啊媽呢邊，佢鄉下係廣東省增城縣玄村（寒音）。據說，解放前，啊公喺鄉下係〝保長〞，家有屋，有田，都應該係小富卦。但啊公後來又食鴉片煙，又賭錢，搞到又賣屋，又賣田。啊公有個親細佬，我叫佢做二叔公，佢唔係開當鋪，而係耕田嘅。睇嚟二叔公比啊公生性，所以佢買晒啊公啲田產。

啊公有一子一女，佢個女就係我啊媽，係家姐。個仔就係我舅父嘞。

好應該講吓，我啊媽係點樣嫁咗落香港嘅。以下情節係根據零碎口述記憶而重新組合，同真實歷史有幾吻合，咁真係天曉得嘞。不過的確係the best of my knowledge嘅。剛才提到，我啊公中意賭錢，但係我冇講嘅係，我啊爸都中意賭錢！在上一篇亦提及，啊爸喺三年零八個月日佔期間返咗鄉下。故事係咁嘅﹕

喺一個趁墟日（market day？）增城縣城 - 增城街十分熱鬧，嚟自各村镇嘅人，買嘢嘅買嘢，賣嘢嘅賣嘢。不過當然唔少得嘅，就係賭檔嘞。有個來自外地，奀奀細細，人稱香港仔嘅人，亦喺賭檔裹面。今日佢手氣似乎頗好，有多少斬穫噃！又有另外一個人，佢身材高瘦，佢來自玄村，個名叫曾黃惠。佢今日手氣唔多好，連戰皆北。

故事發展到呢度，出現两個分枝，各位自選其一﹕

可能性1﹕

香港仔對曾黄惠講﹕「你今日唔係幾好手氣，又欠落賭債。嗱，不如咁嘞，我幫你搞掂啲債，而且比番咁多咁多個大洋過你。不過聽講你有個女喺屋企未嫁，不如叫佢跟我，和平後，我帶佢落香港，好冇？」

可能性2﹕

曾黃惠對香港仔講﹕「我今日唔係幾好手氣，又欠落賭債。嗱，不如咁嘞，你幫我搞掂啲債，聽講你喺香港走日本仔返嚟，又未成家立室，我有個女，正係二八年華，不如叫佢跟你，和平後，你帶佢落香港，好冇？」

故事繼續發展﹕

到咗1945年8月，美國佬喺廣島，長崎掟咗两粒原子彈……..。和平喇！

喺玄村，曾黃惠個女，收拾好簡單細軟，走出村口，就跟咗香港仔喇，佢個細佬叫錦初，好唔捨得咁送家姐到村口，目送佢哋走遠。（相送呢段情節係舅父親口講比我知，佢話最難忘就係睇住紥起孖辮、攞住包袱嘅廋小背影一路遠去。後來當啊媽過身時，舅父話，呢次係第二次送別家姐！！）

咁佢就嚟咗香港喇！

請留意下一篇