我唯一認識嘅群英學校校友，佢孭住有學校名嘅書包
2011.04.08 聽我講故（18）群英學校
群英學校係我舉第一間學校，有兩間，都係喺登龍街。一間喺街中間，喺二樓，樓下係一間士多。就喺我屋企斜對面。另一間喺街尾，出面就係熟食大牌檔。計番時間，估計（？）可能係五歲入學，讀到七歲，共两年。
記憶片段（不分先後）：
走學
有一日喺學校，不知如何，竟然比我走甩咗，離開咗學校，去檔口揾啊媽。啊媽嚇咗一跳，點解返返吓學會出咗檔口？即刻捉番我返學校。有冇因此受罸，就唔記得喇。
派糖
每日返學都一定要帶手巾仔，到臨放學時，各同學仔就將手巾仔鋪喺書枱面。先生就會逐一派糖。冇手巾有冇得食？唔記得咯。
出貓
先生要默書，佢讀我哋默。佢讀個「蘭」字，我唔記得點寫，但我抬頭見到招牌，白底黑字，寫住「蘭花美容院」。咁我就照抄可也喇！算唔算出貓呢？
國文
唔知點解咁記得呢兩課書，應該係國文。
第一課 孫中山先生
孫中山先生，救國救民，推倒滿清，建立民國。
第二課 黃花崗七十二烈士
黃花崗七十二烈士，黄花崗，好烈士。
攻打两廣總督府，犧牲七十二。
大名留人間，精神永不死。
記得重有講陸皓東同青天白日滿地紅旗，但唔識唸喇。
今年三月喺香港同簡珠講起群英學校，佢居然讀過群英，重有一張相，孭住有學校名嘅書包。我哋係校友！真犀利！
我只記得咁啲啲，真失敗！
No comments:
Post a Comment