波斯富街舊居，由窗可望落電車路，可以係厨房煮食，唔駛係街市開餐相，大約係75年左右影嘅。
聽我講故（11）登龍街周圍（一）
石礐下邊就係大水沆，對岸又有石礐，跟住就係著名嘅鵝頸街市嘞！今次唔講街市住。
行向登龍街尾再向北就連接軒尼斯道，即係電車路。東行及西行嘅電車，如果要向南轉入跑馬地，都要喺呢度轉入波斯富街。嗰時冇自動轉軌，全部靠人手。電車公司造咗兩個高架嘅亭仔，工人坐係亭仔內，一見有電車要轉入跑馬地，就一手堆地面大鐵條手掣，用以改變路軌方向，另一手拉動凌空手掣，用以改變架空電纜方向。有時唔知係唔係條友仔喺度瞌眼瞓，架電車過咗，但係條車頂電線桿就直行，冇耐，成條桿就彈起，搞到火花四濺﹔又或者撬唔切路軌，架電車就會出軌喇。咁電車公司救車隊就會出動，搞返掂佢。我啊哥都係救車隊成員之一，有時係新聞報導，都會見到佢。
重有兩條比較隱閉嘅通道﹕
我哋由堅拿道西行入，經過三個熟食牌檔，即向右（南）轉上行人路，就會見到巷仔。入去一直行，就會通到旺到七彩嘅羅素街。
另一條係喺登龍街向東直行，唔轉左（北），反而轉右（南），即可穿入巷仔。再直行50米，就見分义，一條係繼續直行（南），又可通到羅素街﹔一條左轉90度向東行，可以行去波斯富街。
巷仔係兩幢樓中間空出嚟嘅通道，好多時亦係樓宇嘅後門，如果係餐室食肆嘅話，佢哋就會利用後巷洗碗碟，燒燒鴨。雞鴨、肉食公司等就會喺呢度劏雞、燒豬腳毛等唔方便喺舖內進行嘅工作。但如果巷仔係用嚟做通道嘅話，就會唔同，好多人就會喺兩旁擺檔，究竟邊個可以擺檔，睇嚟係江湖規矩、約定俗成、先到先得等等。西邊嘅巷仔，似係後巷多啲，不過巷口都有幾檔例如寫信、熟食等。
而東邊巷仔，因為係通向波斯富街嘅通道，所以十分忙碌，巷仔兩邊擺滿檔口。計有﹕兩檔街邊理髮、麵檔、多檔寫信、盲公占卦、修理鐘錶、補鞋、配匙及多檔賣雜物嘅檔口等等等等。
我10歲左右，由登龍街搬去波斯富街（實在係羅素街交界）。我重好記得搬屋嘅情景，由登龍街去，只係幾百米路程，我哋全部家當，一架借返嚟嘅木頭車就一次過装晒，生活真係可以好簡單。
點解要搬？啊爸話一來驚火燭，因為木樓如果燒起嚟可以好大鑊，而且我哋樓下係紙倉﹔又試過隔籬牀位喺牀食烟，燒著布帳﹔當晚逃離火場情景，仍深印腦中，托賴最終冇事，都嚇餐死喇嘛！二來驚冧樓。所以搬去石屎樓。咁係進咗一步嘅，我哋由4呎Ｘ6呎牀位，搬去有6呎Ｘ6呎嘅板間房。有自己嘅門，重有一排窗，可以望落街喎！我記得啊爸話，要捱租都好艱難，因為住牀位每月交５蚊雞租﹔而家大拿拿要交９５蚊！我哋喺呢度住得最耐。啊爸住到過身﹔啊媽住到行動有問題（04年）至同啊哥搬去禮頓道一間有電梯嘅大厦住，此是後話。
波斯富街係進入大球場，禮頓山及跑馬地嘅主要通道，所以有親跑馬，即係星期六下晝，又或者大球場有波打，波斯富街都會人山人海。喺跑馬結束後，隨住人潮散後，就馬經、馬報散滿一地。又如果球迷對賽果有不滿，就會燒報紙然後丟落垃圾桶，引起一個又一個小火！最勁嘅一次係六幾年，唔記得英國邊位皇室成員訪港（唔係事頭婆啩，會唔會係雅麗姍郡主？）。巡遊隊伍經波斯富街入大球場，我可以趴喺上格牀，望落街觀看巡遊。記得隊伍中有行履帶嘅装甲車，巡遊過後，瀝青馬路留有履帶痕跡！
我一落樓梯出口就係熱鬧到飛起嘅羅素街！
下一篇，羅素街
No comments:
Post a Comment