第三排，右邊第三個學生就係我
2011.08.04聽我講故（22）賽馬會官小（四）
小學由一年級至六年級，每級有四班，分成ABCD。成績好嘅會編入A班，所以有人話「我讀A班」，絕對係夠晒威水。其他冇咁叻就編入BCD，不過，我感覺，校方再會用操行分班。又水皮又壞嘅，又水皮又頑皮嘅，又水皮又鈍嘅，分入唔同班，方便管理。我梗係入咗頑皮班喇。六個年級，每級四班，總共24班。我印象中，我多數係C班，而且，基本上係原班人馬由一年班讀到六年班。
小學嘅科目好簡單，係中、英、數、社會、自然、健教、勞作、音樂、體育。英文要二年級開始有，到五年級男生有木工，而女生有家政。我上木工堂，造咗一個厠紙架，呢個厠紙架喺屋企用咗好多年好多年。
一、二年級時有故事堂，先生入課室，安坐先生枱，就問，邊個出嚟講故仔。我一定舉手，我嘅故仔全部係即席爆肚。先生多數都任你講，佢樂得坐定定人工，坐以袋幣。有時我講得過火位，屎尿屁出齊，先生就會話，唔好講肉酸嘢。
上音樂堂時，要排好隊落音樂室，小朋友坐好後，就開聲先。先生用鋼琴伴唱音階，先用「哦」嚟唱do mi si do’ so mi do，再用「呀、唔、依……」。之後就打開歌書唱歌啦！我記得嘅歌有﹕水仙花、紫竹調、蘇格陵蘭的藍鐘花…等。我應該幾鍾意上音樂堂。
我鍾意運動，但小學上體育堂就冇乜印象嘞。可能嗰時啲先生當上體育堂係佢哋嘅休息時間，於是「放羊」，即係任學生自己玩，自己就一係無所事事，四圍踱。一係就開張書枱，喺度改功課。唯一記得嘅體育先生係楊sir，楊永震。我啊爸叫佢豆皮佬，可知佢塊面係點。但我都只記得兩堂。一次係教打排球，嗰時係9人排球，詳情就唔記得喇。一次教籃球，我只記得我跑喺佢前面，搞到佢仆咗落地，我重記得佢尷尬嘅笑容。
學校年尾時會搞遊戲日，即係變相嘅運動會，當然係我大顯身手嘅日子，我記得我最叻嘅係「執豆袋」同二人三足。執豆袋係將4、5個豆袋分開10m，15m，20m…放喺「跑道」上，比賽開始，學生跑去執第一個豆袋，即回頭放喺起點綫後，再去執第二個，再回頭放喺起點綫，如是者來回來回，直至攞住最後一個豆袋冲綫。我係贏梗嘅！六年級嗰一年，我跑完，梗係氣喘如牛，班主任Miss Lee叫我坐喺佢身邊，問我﹕「你重有冇氣？」呢一幕，我記得好清楚。
二人三足需要拍檔，我嘅最佳拍檔係梅汝強，花名腐乳仔。人哋做二人三足係一步步行，而我哋係大步大步跑，全校未有人快得過我哋。我哋唔駛點練，到比賽前幾日，返學排隊時，喺學校門口，每人攞出自己嘅手巾仔，綁成一條，用嚟綁腳，咁就練得喇。秘訣就係脚要綁得夠實，同埋，最緊要就係信得過你嘅拍檔，咁至可以放膽跑。腐乳仔佢肥肥白白，屋企好似都係喺鵝頸街市做雞鴨檔，所以有時放學一齊返屋企。佢未讀完小學就走咗去學厨，此後就再冇見過面喇。
好多年後（85年？我喺摩理由山工業學院教體育），我去一個小學同學嘅婚禮，佢（新郎）個細佬原來係我摩工嘅學生，世界真細小。冇見十幾年，佢哋知道我教體育，個個都認為係理所然，可知我喺同學印象中，係一個「運動」型嘅人。
我哋嗰陣，多數都係來自窮家，個個都污糟邋遢，周身一陣味。但係有一個同學，叫蔡昌武。佢烏weir到連我哋呢班污糟友都頂佢唔順。重有，佢經常著住啲唔啱身嘅衫褲，有時著住黑孖孖嘅白飯魚，其中一隻又會龍船咁大，又冇鞋帶…，總之就嚇親人。排隊時，佢身邊嘅女仔即時彈開，小息時，冇人會受埋佢玩。而家諗番起，佢都幾慘，佢應該係被屋企忽略照顧，窮啩。我嗰時已有同情弱小之心，所以我反而經常受埋佢一齊玩。話時話，我小學時都算係一個領袖式人物，我話受埋蔡昌武，其他人唔會反對。最經典一次，係楊sir頂佢唔順，比錢佢，叫佢買過對白飯魚。
典型戲劇情節，每班都有一個神高神大，但又儍更更嘅男生，重要成日比啲細粒過佢好多嘅同學整蠱。我班都有一個，叫王傑昌，花名傑佬。佢口齒笨拙，唔多出聲，生得高大粗壯，但睇樣已知係可以整蠱嘅人，腦筋轉數當然唔似我哋細細粒咁快。但我哋唔會整蠱佢，重成日一齊玩添。每年遊戲日，都有拔河比賽，傑佬一定係做最尾嗰個。
戰後，人口激增，需要大量學校。將一間學校分成上下午校，就變成兩間學校。我讀下午校，每周返五日學，隔周返星期六上午，叫做返「長周」，唔駛返就叫「短周」喇。平時日子無辦法做課外活動，於是就喺長周六放學後，用兩小時搞課外活動。但只係五、六年班嘅學生先至可參加。我報名參加小狼隊，後來叫幼童軍。個負責先生見我，話我要考試考成點樣點樣至可參加。我唔記得我考成點，但我終於參加咗小狼隊。
首先，要啊爸買套綠色童軍制服及黑皮鞋，再去scout shop買帽、布章、皮帶、長襪、襪穗。而家諗起，嗰陣屋企咁窮，啊爸都花呢啲錢喺我身上，我十分感激。將布章釘喺襟袋同臂上，到長周六，人人返學著白衫灰褲校服，我就著住小狼隊制服，都幾威威。到而家我重記得小狼誓詞﹕
「我願盡所能，對神及居留地，盡我責任，遵守小狼規律，每日行一善事。」
參加得小狼隊嘅，都係A班學生，我呢個C班嘅，算係異類。
我好懶，所以做小狼期間，冇考過章。除一般活動，如旅行、野火會外，參加過全港童軍銀禧營火活動。
呢個帶我哋小狼隊嘅miss，比我留下好深印象。嗰陣大陸正值文革如火如荼之時，我思想開始左傾，全校都知我係左嘅。有一日，我喺學校門口排緊隊，就係呢個miss，佢叫我去教員室。佢對我講，佢啲屋企人喺大陸點樣比人清算，叫我唔好亂咁信宣傳，等等。當時，我邊聽得入腦，只認為呢個miss係反動派。
講你都唔信，嗰時好興毛主席像章，我有唔少，裝滿一個藍罐曲奇罐。有一日，唔知黐咗邊條筋，我底衫扣滿像章，再著白恤衫校服返學！我相信全人類都睇到恤衫內嘅嘢，但先生又冇講乜嘢，同學又冇講乜嘢，平平安安放學返歸！
學校有搞常識問答比賽，我代表6C班出賽，一般嚟講，A班係精英班，一定贏硬。但係今次佢哋遇到勁敵6C班，我哋追得佢好緊，可惜最後我哋僅以些微分數輸咗。但因為有個人得分最高獎，我啲隊友谷我攞高分，所有搶答都比我答晒，目的就係要打低A班！最後合作成功，我攞到個人最高分獎。可知當時台下幾高興，C班打贏招積嘅A班，啲懶仔，水皮友幾咁心涼。
頒獎日係星期六，我著住小狼隊制服上台攞獎，上台踏步走向黃日興校長，先企定，用石手V型手勢敬禮（小狼隊用兩隻手指，童軍用三隻手指），再踏前用左手握手（童軍用左手握手，表示真誠）。攞過獎品，轉身走人，行番落去自己班排隊嘅地方。呢一幕我點會忘記！
好可惜，獎品係一本字典，唔係獎座，所以唔多高興。係唔係因為A班贏唔到，所以唔比獎座？我同我啲隊友及死黨都唔順氣。領獎完畢，排隊返回班房，大家好㷫，就揭起書枱面大力冚番埋，發出砰砰聲。唔夠一分鐘，楊sir來到班房對全班話﹕「做乜咁嘈！」。我哋即刻收聲，佢亦離開，又冇罸我哋，呢件事就此落幕，留下記憶。
講完威水史，講吓瘀嘢。我雖然窮，但我係孻仔，十分有少爺脾氣。有一次，唔知點解又發老脾，冇食飯就返咗學。我排隊上班房，行到正門大堂時，赫然見到啊媽企係樓梯前，著住濕漉漉嘅圍裙，手捧住有飯有餸嘅湯碗，重有筷子匙羹。啊媽見到我大聲話﹕「食飯先喇！」我梗係覺得好尷尬啦，猛話，「我唔食，我唔食。」然後頭耷耷，跟住大隊上班房。當時覺得好瘀，而家別有一番滋味在心頭。
講吓返學嘅裝備。白裇衫，灰斜褲，冬天加藍色校褸，再配白飯魚，就係校服啦。孭住斜孭帆布書包，另一邊斜孭住紅Ａ膠水壺。如果落雨，會著膠雨樓同膠水靴。著住膠水靴，就專去踩水氹喇！冬天日短夜長，我哋會帶電筒返學，六點半放學時，天已黑晒，我哋用電筒互照，又或者由下向上照住自己個下巴扮鬼嚇女仔！
講起鬼，而家集成中心隔籬個籃球場，舊時係香港殯儀館。我哋放學一定經過。有時會約埋幾個同學，專登用隔籬樓梯由灣仔道向軒尼斯道方向行落，再右轉入巷仔，嗰度係殯儀館嘅停屍間，經常見到有打包車仔堆出來，細時見到，十分刺激。
六年級我哋要考升中試，唔係個個有得去考，先要考一個甄別試。我好彩合格，有得去考升中試。升中試試場就喺賽馬會官小，所以冇得考嘅人，當日就放假。我同學鄧志章話﹕「真係冇癮，年年今日我都放假！」佢甄別試唔合格，冇得去考升中試。當日，記得係下午考，啊媽同我去羅素街大牌檔食咗午飯先，自己行返學校，呢個係我第一個公開試。我有冇為升中試作任何準備？答案係﹕冇，一啲都冇。放榜啦！成續係3，7，8（中英數），咁嘅成績邊有中學派。總之，小學就讀完啦！
下篇升中學喇。
No comments:
Post a Comment