聽我講故（10）登龍街（二）
成條街多數係四層高嘅戰前舊樓，間中有幾幢9層或6層高嘅石屎樓。多數地下都係舖頭，但間唔中都有住人嘅，又有前舖後居。
樓上除咗住人外，間中亦有作其他用途，例如美容院，幼稚園等。講起幼稚園，一定要講呢一間，佢叫群英學校﹔有兩間，一間喺街中間一幢6層高嘅二樓，另一間喺街尾樓下兩個單位。相信係我第一間讀嘅學校，我哋嗰時有〝兒歌〞唱嘅﹕「群英學校，lau lau gau gau﹔群英先生，教壞學生」。我兩間都讀過，有兩件事我記得嘅。
其一﹕我哋返學一定要帶手巾仔，每當小食時間，同學仔都將手巾舖係自己書枱上，然後坐定定。先生逐個將兩粒糖同兩塊餅干，擺喺各手巾仔上面。如果冇帶手巾仔，即係冇嘢食﹔不過唔知如果曳曳會唔會冇得食或者得一半？就唔記得嘞！
其二：有一次默書，默個「蘭」字，你知我幾勤力嘅啦，當然係唔識！但我即刻諗起樓上有間「蘭花美容院」，抬頭一睇，果然見到個招牌，當然照抄啦！咁算唔算出貓呢？如果算，咁呢次就係我記憶中嘅第一次出貓。
街內實在有好多小作仿，除咗屋企對面李三記打鐵舖外，有幾間製麵厰，出產蛋麵，河粉等製品，應該主要供應酒家食肆，街坊散賣亦可以。有啲喺舖前面做埋早餐，淥麵加豬皮魚蛋油菜等。我最鍾意喺呢度食早餐，佢會問你要生油或豬油，我梗揀豬油（中山話咁講﹕杯鏡唔怕肥）！運動夠係OK嘅！
就喺我住嘅附近，有好幾間三行鋪。我樓下不遠，有間專賣水泥，沙，磚等建築材料﹔跟住有間造木嘅工塲，佢哋唔賣嘢，就係接訂單造，應該都接外出嘅工作，倒如間房，造閣仔等木工，造木嘅一定做埋油漆嘅。每逢農曆七月十三，呢啲三行舖都掛上白色，粉紅色嘅燈籠仔，因為呢日係魯班先師生日，三行佬都奉魯班為師傅，所以又稱師傅誕。就算建築地盤或工地都掛上燈籠﹔師傅誕晚上，各位伙記食餐勁，劏雞殺鴨不在話下，最得意嘅係各三行舖頭會派米比街坊。
除咗正式街舖外，喺樓梯底或樓梯邊都會有細小嘅舖仔，做嘅嘢有修理鐘錶，配匙、補鞋、織補、麻雀牌、水電小工程等小手作。
亦有幾間士多，士多最突出嘅係門口嘅大水櫃，裹面擺滿啤酒汽水。客人自己趟開櫃頂門，揀好飲料，用櫃邊嘅開瓶器，cheee.. 一聲打開荷蘭水蓋（如果蓋底有獎嘅話，就用手接住，唔比個蓋跌落櫃內嘅瓶蓋收集筒）﹔攞飲管插入樽內，比錢，即刻喺度飲晒，因為要還樽。如果要拎走，就要比錢按樽，回樽時攞番錢也。啤酒樽就唔駛按樽，不過個樽係可以賣比收買佬。
講番個水櫃，啲水係凍到飛起，但點樣可以揀支冰凍嘅水呢？老闆唔會比你放手入水裹面，怕整污漕啲水。我哋會用手背掂下個蓋，就感覺到支水有幾凍！
士多有好多嘢賣，煙、酒、餅干、糖果，雜糧，後期更自製食品如豬皮、魚旦、遮厘、煎糕等。士多亦可借用電話。人手夠嘅話，士多亦會送貨，煙，啤酒，汽水都送。飲完，將樽放喺門口，第二日，士多就會揾人嚟收。士多仲有麻雀枱面同牌租𠻹。
一路向東行，到尾再向北轉90度就係街尾，喺呢度面向軒尼斯道嘅左手面路邊有三個熟食大牌檔﹔分別係奶茶檔、麵檔同朝州打冷檔。最特色嘅係麵檔嘅魚旦係自己打嘅，打完魚膠後唧成魚旦，或長方形魚條（以後再切成魚片），然後或蒸或炸。每次經過呢度，都聞到魚旦嘅香味。
直出軒尼斯道轉右就係永安公司，嗰時細個，著住笠記牛記，腳踏膠帶木屐，一走近永安門口，守門嚤囉差就會行理嚟，用啊星口音話﹕「細路，你哋冇做得入嚟！」
登龍街就講到呢度，以後陸逐講吓我嘅活動範圍（由登龍街向周圍幅射開去），同埋喺嗰度所發生嘅事！
留意下一篇。
成條街多數係四層高嘅戰前舊樓，間中有幾幢9層或6層高嘅石屎樓。多數地下都係舖頭，但間唔中都有住人嘅，又有前舖後居。
樓上除咗住人外，間中亦有作其他用途，例如美容院，幼稚園等。講起幼稚園，一定要講呢一間，佢叫群英學校﹔有兩間，一間喺街中間一幢6層高嘅二樓，另一間喺街尾樓下兩個單位。相信係我第一間讀嘅學校，我哋嗰時有〝兒歌〞唱嘅﹕「群英學校，lau lau gau gau﹔群英先生，教壞學生」。我兩間都讀過，有兩件事我記得嘅。
其一﹕我哋返學一定要帶手巾仔，每當小食時間，同學仔都將手巾舖係自己書枱上，然後坐定定。先生逐個將兩粒糖同兩塊餅干，擺喺各手巾仔上面。如果冇帶手巾仔，即係冇嘢食﹔不過唔知如果曳曳會唔會冇得食或者得一半？就唔記得嘞！
其二：有一次默書，默個「蘭」字，你知我幾勤力嘅啦，當然係唔識！但我即刻諗起樓上有間「蘭花美容院」，抬頭一睇，果然見到個招牌，當然照抄啦！咁算唔算出貓呢？如果算，咁呢次就係我記憶中嘅第一次出貓。
街內實在有好多小作仿，除咗屋企對面李三記打鐵舖外，有幾間製麵厰，出產蛋麵，河粉等製品，應該主要供應酒家食肆，街坊散賣亦可以。有啲喺舖前面做埋早餐，淥麵加豬皮魚蛋油菜等。我最鍾意喺呢度食早餐，佢會問你要生油或豬油，我梗揀豬油（中山話咁講﹕杯鏡唔怕肥）！運動夠係OK嘅！
就喺我住嘅附近，有好幾間三行鋪。我樓下不遠，有間專賣水泥，沙，磚等建築材料﹔跟住有間造木嘅工塲，佢哋唔賣嘢，就係接訂單造，應該都接外出嘅工作，倒如間房，造閣仔等木工，造木嘅一定做埋油漆嘅。每逢農曆七月十三，呢啲三行舖都掛上白色，粉紅色嘅燈籠仔，因為呢日係魯班先師生日，三行佬都奉魯班為師傅，所以又稱師傅誕。就算建築地盤或工地都掛上燈籠﹔師傅誕晚上，各位伙記食餐勁，劏雞殺鴨不在話下，最得意嘅係各三行舖頭會派米比街坊。
除咗正式街舖外，喺樓梯底或樓梯邊都會有細小嘅舖仔，做嘅嘢有修理鐘錶，配匙、補鞋、織補、麻雀牌、水電小工程等小手作。
亦有幾間士多，士多最突出嘅係門口嘅大水櫃，裹面擺滿啤酒汽水。客人自己趟開櫃頂門，揀好飲料，用櫃邊嘅開瓶器，cheee.. 一聲打開荷蘭水蓋（如果蓋底有獎嘅話，就用手接住，唔比個蓋跌落櫃內嘅瓶蓋收集筒）﹔攞飲管插入樽內，比錢，即刻喺度飲晒，因為要還樽。如果要拎走，就要比錢按樽，回樽時攞番錢也。啤酒樽就唔駛按樽，不過個樽係可以賣比收買佬。
講番個水櫃，啲水係凍到飛起，但點樣可以揀支冰凍嘅水呢？老闆唔會比你放手入水裹面，怕整污漕啲水。我哋會用手背掂下個蓋，就感覺到支水有幾凍！
士多有好多嘢賣，煙、酒、餅干、糖果，雜糧，後期更自製食品如豬皮、魚旦、遮厘、煎糕等。士多亦可借用電話。人手夠嘅話，士多亦會送貨，煙，啤酒，汽水都送。飲完，將樽放喺門口，第二日，士多就會揾人嚟收。士多仲有麻雀枱面同牌租𠻹。
一路向東行，到尾再向北轉90度就係街尾，喺呢度面向軒尼斯道嘅左手面路邊有三個熟食大牌檔﹔分別係奶茶檔、麵檔同朝州打冷檔。最特色嘅係麵檔嘅魚旦係自己打嘅，打完魚膠後唧成魚旦，或長方形魚條（以後再切成魚片），然後或蒸或炸。每次經過呢度，都聞到魚旦嘅香味。
直出軒尼斯道轉右就係永安公司，嗰時細個，著住笠記牛記，腳踏膠帶木屐，一走近永安門口，守門嚤囉差就會行理嚟，用啊星口音話﹕「細路，你哋冇做得入嚟！」
登龍街就講到呢度，以後陸逐講吓我嘅活動範圍（由登龍街向周圍幅射開去），同埋喺嗰度所發生嘅事！
留意下一篇。
No comments:
Post a Comment