聽我講古（21）賽馬會官小（三）

聽我講古（21）賽馬會官小（三）

文章日期：06/27/2011 04:09 pm

2011.06.7 聽我講故（21）賽馬會官小（三）

喺我個小學過程中，我冇做功課嘅記憶，唔知係冇功課，抑或係成日都冇交功課？都有啲印象先生會罰抄，抄嘅係「罰句」，例如，「我以後要準時交功課」，抄100句等等。

平時，喺課室，如果唔守秩序，例如同隔籬傾偈，周身郁坐唔定等，先生都會處罰。

罰企，最簡單就係企喺自己個位度。不過有時企喺度仍然搞搞震，先生上堂又望到，篤口篤鼻，於是就罰企出黑板。企黑板就係先生背後，條友仔又扮鬼扮馬，引到全班大笑，先生就會叫佢向住黑板，重要個鼻掂任黑板。如果受罰者背後都識做戲，先生就要佢企喺門後面。

如果懲罰未夠，重可以罰埋小息冇得玩，小息時會見到一個個頑皮仔一行企開，風紀會看住。再緊要啲就企上禮堂台上示眾。我試過頸上掛住一個紙牌，上面寫住「我是大懶蟲」，企喺台上示眾。當時，冇覺得受侮辱，可能寫嘅係真話啩。

小學有木工室，木工先生重要製作之一就係木介尺，有呎半長，闊三、四，厚一、兩吋左右，好多先生都帶住入課室。邊個冇交功課，默書零蛋等，出嚟排隊打手板。唔准縮，唔係打多吓。我哋嗰時男仔有男仔風範，唔會縮，亦唔嗌痛，更加唔會喊。我都打得唔少。

聞說再嚴重啲就會捉去比校長打屁股，只罰男生，女生冇份。呢啲只係傳聞，我同我身邊嘅同學都未試過。

同受罰相似嘅就係打預防針，醫務處派一隊打針姑娘，喺有蓋操場內，將針，棉花、酒精燈…放喺乒乓波枱上，我哋學生一個個排好隊埋去打針。有女生驚到唔敢睇，男仔幾大都話唔驚。問我痛唔痛，一定話唔痛。

話唔痛啫，針口一定有啲痛，頑皮仔就專去打人嘅針口，所以打完針後，個個都會保護好自己嘅針口，唔比人打親。第二日，有啲人就會用個半蛋形、疏窿嘅蓋仔，遮住個針口，一來唔駛比人踫到，二來針口會痕癢，咁樣唔會抓傷自己。

留意下一篇