聽我講故（13）鵝頸街市（一）
呢篇文，我喺2010年寫成，2016年，我搵到呢張相！證明我嘅記憶力好OK！
我最古舊嘅鵝頸街市之印象係咁嘅﹕
街市嘅東面邊沿就係鵝頸大水沆嘅西邊一列石壆。如果要由堅拿道東進入街市只有兩條路。一係由北端行過軒尼斯道鵝頸橋進入﹔一係由南端，羅素街口前經過一條石屎路面鐵欄杆嘅橋，跨過大水沆進入街市。由結構來睇，街市分為兩個部份：
北面係石屎起成嘅單層平房及檔口。又分成兩部份，北端有管理員嘅宿舍，管理員嘅一家人就住喺呢度，我哋叫佢做「老鼠王」。（嗰時市政局喺街市及公厠劃出地方作為管理員嘅宿舍。所以我哋會見到公厠樓上或側邊係有人住嘅！佢哋屋企一定好和味）老鼠王屋企隔籬就係劏雞鴨嘅地方。北端面向軒尼斯道，有一空地，記憶中嗰度放滿好多好大個用竹篾織成圓形嘅雞鴨籠。好記得「吹米鴨」。為咗谷肥啲鴨，啲雞鴨舖伙記一手喺個鴨籠內執住隻鴨對翼揪佢出來，捉住佢個鴨頭，擘大佢個鴨嘴，將一個平咀、中空、圓錐形嘅吹咀放一半入鴨嘴，比隻鴨咬實。另一手攞一揸米放入吹咀中，再同隻鴨口對口急吹一口氣，將揸米通過吹咀，全部吹晒入隻鴨個肚裹面，再同隻鴨個肚按摩幾吓，咁就完成「吹米」過程喇。我成日睇佢哋吹米，非常娛樂性。
再向軒尼斯道方向，有一個，人咁高嘅籃球場咁大嘅紅磚砌嘅結構。我哋叫佢做水塘，應該係貯水嘅。有磚砌嘅石級，可以行上水塘頂。印象中，驚蟄時，水塘邊都有人開檔打小人。
回頭向南，有一條小巷將老鼠王屋企同有蓋石屎檔隔開。呢一列檔口分成面向東（水沆）及面向西（堅拿道西）兩半。每邊有約10檔，即全部有約20檔。向東嘅係豬肉檔及兩間牛肉檔。向西嘅係雞鴨檔，魚檔及牛肉檔。面向堅拿道西呢一邊，有比較闊嘅行人道，所以好多小販就喺呢度擺走鬼檔，我都喺呢度擺過唔少。多數揾個籮蓋，上面放住幾份葱，就咁擺喺地下賣，大聲叫「斗零份葱」。我而家咁大聲，又唔識怕醜，都係咁練成嘅。
每日早上，有好多運菜、豬、牛、雞鴨、活魚，冰鮮魚等等嘅貨車停喺堅拿道西呢邊落貨。因應運載唔同嘅貨物，貨車個樣，送貨嘅人，操作方法亦各異。先講豬牛羊，喺香港豬牛羊只可以中央屠宰，肉舖僱請「買手」用拍賣方式買得活豬牛羊，買得嘅豬牛羊嘅身上（皮）就寫上舖頭名稱，再交市政事務處属下屠房屠宰，係要比錢嘅。屠宰好後，屠房喺豬牛羊身（皮）上蓋章，證明呢隻嘢可以合法售賣。再用市政處嘅運豬車照着豬皮上寫住嘅舖頭名交到各肉店。印象中運豬車喺棗紅色鐵皮密斗貨車，車尾有兩扇高大向外開嘅掩門。車底好低，托豬工人，可以由街上好容易就行入車斗內。但車斗好高，豬牛羊可以一隻隻垂直掛起都掂唔到地。托豬工人身披一塊染滿鮮血嘅白帆布，而佢自己亦滿身鮮血。佢托隻豬，用小跑步送去肉舖。路人一見到托豬佬，馬上雞飛狗走，名副其實殺出一條血路。邊個唔好彩走避不及，輕則比隻豬踢一腳，最慘係比隻豬揩到成身豬血，咁就水洗都唔清喇。
魚分活魚同冰鮮魚。運送活魚嘅貨車上有幾個木造嘅魚缸（而家改用纖維）。魚店工人一見魚車到，就攞一個約1米長嘅大魚網，交比跟車，佢喺木魚缸撈魚再交比魚店工人，佢即刻返去將魚倒落舖頭魚缸內。唔駛講做呢行嘅人，一定由頭濕到腳趾尾。
而冰鮮魚則用矮竹籮或竹茜盛載，魚被大量冰雪埯理。車一到，跟車就將一籮籮嘅魚御落地上，唔理有冇人收就開車走人。每籮魚都有魚店名嘅標纖，我哋嗰時就將魚送到魚店，魚店就會比一亳子我哋，咁我又有一毫子買嘢食喇。
留意下一篇
豬肉舖
No comments:
Post a Comment