聽我講故（6）有味故事
講過房、牀位、厨房都提過，厠所、浴室又喺邊呢？…喺冇嘅！我陣間再講呢啲問題。
尾床位，即係我屋企，就對住厨廚房嘅門口。要行两級石級至可走入廚房，前面貼牆係一個約3呎高嘅灶台，上面擺滿各家嘅風爐，係燒柴同燒炭嗰種。灶台底就擺滿柴呀炭呀等什物。右手邊有水喉頭同一個用水泥砌成嘅洗碗盆同埋放砧板嘅石臺。牆上釘滿架，架上放滿煲呀鑊呀等等。
我嘅家就喺廚房門口，可知煮起飯嚟喺幾滋味。仲有，圍住舖牀嗰塊布索滿油煙，柴炭灰，一定和味過和味龍！
廚房嘅作用不止於此，呢度亦係浴室，各人輪流攞起盆水，放喺廚房地下，就沖涼喇喂，如果唔怕凍，揾條膠喉駁落水龍頭，又可以照頭淋啦。所以家家住住都有個燒青（搪瓷）面盆嘅，紅色、有朶大花又或者有條大魚嗰種﹔用嚟刷牙，洗面，冲凉，浸腳，洗頭，洗……！唔愛嚟洗衫，洗衫用木盆嘅！
好嘞，大小二解又如何搞掂呢？
先講小問題，我嘅理解係唔難辦嘅，只須去廚房企近或踎近地面嘅去水位，咁……就搞掂啦！
至於大呢，喺咁嘅，嗰時每家人都有痰罐，大人開大嘅時候，可以到自己房內解決，而細路仔就冇咁拘束，隨時隨地，去到邊坐到邊，又可以一路坐一路喂飯都得。如果認為喺痰罐難搞，又可以去公厠。
解決後啲嘢又點搞呢？喺廚房石級嘅右邊，擺咗一個木桶，喺圓嘅，上面有木蓋，木蓋上有垂直長木條手柄。呢個就係〝聞〞名嘅屎桶嘞。所有解决後嘅問題都放喺呢個桶裹面。
我而家先至省起，我瞓嘅地方同呢個充滿問題嘅東西係如此接近！！應該不足5呎。
話時話，因為我啊媽係好怕事，又唔夠人鬧交，所以如果争廚房用就一定唔夠人争，咁連飯都冇得食啦！我哋賣菜個檔口係喺鵝頸街市，行番屋企唔駛5分鐘。所以我哋係喺街市煮食嘅。每日收檔後，啊媽就喺檔口攞出火水爐煮晚餐喇，擺一塊板喺個菜籮上就係飯枱，四面放四個木箱就可以坐喇。四圍望吓，都好多人好似我哋咁喺街市開餐嘅。食過飯後閒話家常，亦可以好温馨啫。之後就喺檔口後面圍起布廉，就可以冲凉喇。洗白白後，就返屋企覺覺豬喇。如果天氣熱，仲可以喺街市瞓添。我仲記得喺街市瞓嘅時候係可以見到滿天星 星嘅，當然亦針到成身蚊斕。記憶中我喺街市應該瞓咗唔少日子。
我記得係瞓白色帆布牀，冚被時，啊爸用鹹水草綁實張被腳嗰邊嘅两隻角，固定喺帆布牀上，因為街市地下污糟，張被跌落地下就麻煩嘞。
喺我印象中，可能我要求低，呢啲日子我都過得好快樂。
跟住我要講下夜來香嘞！
留意下一篇。
No comments:
Post a Comment