聽我講故（15）鵝頸街市（三）
向南，行過晒豬肉枱及牛肉枱，隔一條小巷，就係一行行嘅細牌檔。印象中總面積有半個足球場大小。呢一邊街市多數都係細牌小販，亦有小數大牌嘅。我哋個檔口都係喺呢度。
喺講呢一笪細牌檔之前，先講呢條小巷。我有好多回憶都係發生喺呢條小巷內。啊爸有另一個檔就係喺呢條小巷巷口，面向堅拿道西，右手邊靠住牛肉枱嘅外牆。檔口係用兩三個籮組成，每個籮上放一個竹篾織成圓形嘅〝茜〞，菜就放喺上面賣。檔口左手邊，即係巷嘅另一邊，係一檔賣雞蛋嘅大牌檔。佢哋成日大嗌：「七隻，八隻！」即係一蚊可以買七、八個雞蛋。佢哋亦賣鴨蛋、鹹蛋、皮蛋、鵪鶉蛋…。不過有時啲蛋壞咗變成臭蛋，嗰種臭法，我無法忘記。
到咗冬天，佢哋兼賣臘腸臘肉臘鴨等。啲腊味買番嚟嘅時候係裝喺木箱嘅，有一次個蛋佬打開一個裝腊鴨嘅木箱，一睇，成箱腊鴨佈滿晒白雪雪嘅虫，每條都鬼咁生猛郁郁貢，此情此景，焉能忘懷？
記得有一次，就喺呢條巷，我唔知戚起邊條筋，問啊爸攞斗零買嘢食。佢唔比，我又喊又氹地，不停咁講：「比斗零我，比斗零我」，纏咗好耐。但係啊爸又冇打我，又冇鬧我。只係挨住牆、翹住腳，双臂交义胸前，（好似奇哥咁欵），手執兩個銀仔用嚟掹鬚，個樣好似好多嘢諗緊咁。最後我連斗零都攞唔到，但晤知點解，呢一幕情景，就到而家都記得好清楚。
每日收檔前，都要將菜擺番入籮內。防止菜會變壞，首先用報紙鋪好籮底同四周。然後就一層菜、一層雪咁擺。冚好籮蓋，推埋一邊，咁就收咗檔喇。
巷仔呢一列都喺大牌檔，賣嘅嘢比較矜貴，好似腊味，罐頭雜貨等。所以收舖就要上板將成個檔口圍住並且加鎖，我張帆布牀就係開喺呢啲板前面。呢條巷仔就係我嘅睡房喇！我記得夜晚可以睇到成個天好多星星，如果月色好，月光可以照到四圍都光晒。喺我上牀後，啊爸都幫我綁好張被嘅四個角，以防我反瞓。如果張被跌咗落地下，就會整污糟，因為地下係濕嘅。
再向南，就係一行一行嘅細牌檔，當然係乜都有得賣，我哋個檔口都喺呢度，但已經冇乜印象嘞！
頭先講過，收檔時要雪住啲菜，咁即係有人賣雪啦。全個鵝頸街市只有一檔賣「生雪」，「生」嘅意思係雪用「生」水造成，即喺唔好攞嚟作食用。雪佬又係姓蔣，叫啊祺。因為生得高大，所以叫高佬祺。最得意嘅喺佢會將啲毫子放喺耳仔窿，由此我知道大耳窿喺乜！批發番嚟嘅雪係一條條嘅，「一條雪」大約係兩呎高、5呎闊、1呎半厚。賣比客之前要用雪插（錐）將一條雪分細，雪唔同嘅嘢，對雪嘅要求亦唔同。有啲要一大塊，有啲要碎雪，碎雪又分粗，中，幼。例如雪菜就會用幼雪。要將成嚿雪變成碎雪就要用雪錐插雪，所以佢要比錢啲細佬幫手，我就係其中之一，每次都可以掙到幾亳子嘅。
高佬祺個細仔細我一兩年，我同佢都有偈傾。有一次，唔知點解佢咁信我，高佬祺叫我帶佢個細仔去游水。嗰時港島只有維多利亞公園池。記憶中細路仔入場費係4毫子，佢重比多幾毫子我哋買嘢食。印象中，我就係咁樣學識游水嘅。
講起雪廠，嗰時銅鑼灣有個雪厰，就喺糖街同維多利亞公園左近。而家你由糖街行入維園，要經過一段高士打道，頭頂有天橋。信不信由你，原來呢一段馬路，嗰時係一個海灣。有好多躉船停泊在此。由糖街再向海（北）行不久，就係一間雪厰，有一條滑道，由約四樓高嘅外牆，一直伸到落呢個海灣。啲一條條嘅雪就可以直接由工厰滑到船上運走。
维多利亞公園同百徳新街大厦交界係大水沆，有船入，中間金字頂建築就係雪厰，大條雪用滑道直接滑落的上。左邊水之盡頭就係糖街
下一篇，電車公司福利大厦
No comments:
Post a Comment