聽我講古（19）賽馬會官小（一）

聽我講古（19）賽馬會官小（一）

文章日期：04/25/2011 09:13 pm

                                                           出世紙背後嘅兩個日子印

聽我講故（19）賽馬會官小（一）

我有好糢糊嘅印象，屋企討論我讀乜嘢小學。甚至隱約記得攞住出世紙去駐冊，佢（她？）喺出世紙背面印上日子印，等你唔可以同時報好多間小學。我喺出世紙背面揾到兩個日子，1961年5月1日及1962年4月27日。我有合理懷疑，我係遲咗一年入學。查返資料，六十年代，香港教育急速發展以應付戰後嬰兒潮嘅需求。在我之前，讀到官小都好巴閉，自從我都讀到，就標誌住官小已走下坡啦。

學校收咗我嘞，讀嘅係賽馬會官立小學下午校，校服係白衫灰褲。學校喺灣仔活道，除咗前面一列民居外，周圍都係學校，有東華三院小學，救世軍光裕學校，隔咗救世軍街，有維多利亞工業中學（紅磚屋）。而家嘅愛群道，日善街等全部唔存在，嗰時係一座矮石山，乜嘢名？就係叫摩理臣山。重有人喺度搭屋住。山上零零星星有樹、有野草。我哋會一堆人嚟摘山捻食，又喺草叢捉金絲貓（豹虎）、金龜（甲蟲）、水甴曱（和味龍）等。雨後山上有時有大水氹，成日傳浸死人，有水鬼等。我經常喺兩度地方進入摩理臣山，一處就係救世軍街中間，維多利亞工業學校後面，有條路引上山，轉角處有棵樹，呢棵樹而家重保留喺原來嘅地方！另一處係由禮頓道，摩理臣山道轉入崇德街，向活道方向行就上山喇！

我細時唔叫呢度做摩理臣山，叫爆石山。近灣仔道嗰邊而家日善街嘅位置，全部搭住高棚，有竹蓆圍住，每日正午12點就打鑼作警告，跟住就用炸药爆石。跟住就有工人將石打得更碎，再用車將碎石運走。呢度根本就係一個石礦場！

不過，有時炮王用药過猛，會有碎石飛出高棚，跌出灣仔道。有冇人因此受傷，就唔知喇。

猜想第一日返小學嘅日子，應該係1962年9月3日，因為1號係星期六。印象中啊媽同我由檔口行返學校。只此一次有人送返學，此後跟住嘅6年，我都係自己返學放學。

待續…

圖中間係鵝頸大水沆，右下（南）方大草地係 CCC 木球會。左下角嘅石山，就係摩利臣山，向左（西）行過晒石山，就係賽馬會官小。石山東邊就係摩利臣山道，向左（北）直出天樂里、左盡頭就係軒尼斯道。

 

Lily at 05/11/2011 08:50 am comment

you won't believe it, ml, it's my first time to visit your blog!!!!!!!!!!!!!!!!!!! i'm computer idiot and have tried several times but still couldn't  get it. well, i'm now at an internet bar and using the computer there , maybe faster and newer than that at home. after replying your mail, it pops up your blog and there's a link to click to. got it now!!!!!!!!!!!!!!!!!!!!! i'll try again at home, after buying a new computer, maybe next week. if not, i'll keep coming, incredibly cheap - HK$4/hour!!!!!!!!!!!!!!!!!!!! mosquito