聽我講故（16）鵝頸街市（四）
騎喺大沆之上就係電車公司福利大厦，大厦前石屎橋連住羅素街同灣仔道。大水坑左（東）面第一條街，就係登龍街
堅拿道西向南望，左邊就係福利大厦
再向南走，就係街市嘅南端，亦係一條繁忙嘅通道。西邊連接灣仔道、寳靈頓道，可以講，亦係街市一個部份。東邊係跨過水沆嘅鐵欄杆石屎橋，連接羅素街。當我企喺橋上，面向南，喺我前面就有一幢3（2？）層高嘅建築物，佢起喺水沆之上。即喺話，如果有一隻舢舨，佢係可以沿住水沅穿過呢幢樓嘅底部，再撐向禮頓道方向。呢幢建築物就係電車公司福利大厦。我哋都叫佢福利大厦。
福利大厦正門面向堅拿道東電車廠嘅西北角，十分接近羅素街口。正門非常寬闊，有左右兩趟推拉鐵摺閘。鐵閘經常半關上，只露出僅夠一個人通過嘅空隙，以防細路仔或閑雜人等博懵進入。一進入就要上十級八級樓梯先到大堂。看更牛伯（唔知有冇記錯名）喺樓梯頂大堂坐喺一張籐椅，俯視正門。
我哋經常都會聚集喺鐵閘前，好謙卑咁請求：「牛伯，唔該比我入嚟啦！」入去做乜呢？原來大堂嘅北面有一間房，係電視房。房嘅角落頭裝有麗的呼聲電視機一架，我哋係想入去睇電視。不過想睇電視係要付出嘅。
福利大厦嘅二樓有一個禮堂，類似學校禮堂，高樓底及有一個舞台。咁上下，電車公司會喺呢個禮堂舉辦電影放映。咁牛伯就有一個任務，就係擺櫈。擺晒成個禮堂都係櫈，都要體力嘅，牛伯頂住個大肚腩係有一定難度。不過如果有我哋呢班細路幫手，就容易得多喇！要我哋幫手唔難，只要搬完櫈後，比我哋睇電視就得喇！牛伯隔住個鐵閘，好似韓信點兵咁，揀啲手快腳快又唔會搞事嘅細路，即刻上樓開工搬櫈。當然經常選中我。搬完櫈，通常都唔係即刻可以睇電視，例如上午搬櫈，要到下午兩、三點至可入去睇電視。以牛伯嘅記憶力，可能記唔晒啲細路個樣，以防被人博懵。所以搬完櫈後，佢就諗一個諳號，邊個講得出個諳號，就可以以入去睇電視。有一次佢揀左13個細路幫佢手，於是當日嘅諳號就係「今日十三」。好有曹操與雞肋feel！
我就係喺呢個電視房認識大力水手同愛麗絲，唐老鴨，石器時代嘅何輝、慧瑪同班尼、神偷諜影等等。我記得成班細路坐喺地下圍住架電視，睇得十分過癮。
二樓亦有一個餐廳，可叫小菜、炒粉麵、汽水、奶茶咖啡等。我哋細路仔邊會有錢食呢？不過，如果有錢，我會叫碟牛肉炒麵比自己食。嗰時我咁諗。
有一次（十歲左右啩），有人叫我去CCC（紀利華木球會），喺網球場做執波仔，3蚊做一個下晝。第一次執波時，將波手交手咁交比人，嗰個打波友話，唔喺咁比我嘅，你將個波用力掟落地下，個波就彈到比我嘞！而家睇番大滿貫，先知pro嘅執波仔係點做嘢嘅。
3蚊！從來未有過咁多錢。我會即刻去邊？冇錯嘞，去福利大厦。今次巴閉喇，我大踏步行上樓挮，唔駛講諳號，對住牛伯話，我上去食嘢。你有冇錢架？牛伯問。我即刻喺袋摷出3蚊雞好威咁講，有，我有錢架！上到去餐廳，即刻叫一碟牛肉炒麵。呢碟係我第一次用自己賺嘅錢買嘅牛肉炒麵，呢碟牛肉炒麵嘅樣同啲味道我至今未忘，而且以後都食唔番咁好味嘅牛肉炒麵！埋單，多謝個二。價錢我都記得好清楚！
福利大厦對住嘅就係電車廠堅拿道東出口，電車喺呢度駛出再去禮頓道。呢度有三個大門口比電車出入，每個門口都有一對綠色（電車咁嘅色）巨型嘅鐵掩門。門與門之間嘅路邊有三棵樹，我哋呢班細路成日都喺呢附近玩。呢度地面嘅圓形或者方形嘅渠蓋，就係我哋打波子嘅地方嘞！
冇耐，政府將水沆變成暗渠。鐵欄杆石屎橋、沿水沆嘅石壆、福利大厦、堅拿道東嘅電車軌等，全部煙沒在歷史滾滾洪流之中，只剩下一鱗半爪藏喺我呢個小小嘅腦仔裹面………！
留意下一篇
鵝頸街市啲變遷
No comments:
Post a Comment