呢幀相由電車厰內（而家時代廣場）向外影，
啊哥背後幅牆嘅另一面就係羅素街
電車尾向住勿地臣街，電車返厰就由呢度轉入，電車遮檔住嘅就係我住嘅地方， 而家重未拆
聽我講故（12）羅素街
我住嘅地方正係波斯富街，勿地臣街及羅素街三條街交界。我細個時羅素街實在係一條街市街。街嘅南面係電車廠（即而家嘅時代廣場），夜晚收車時，電車都停喺呢度。電車厰同羅素街用一列牆由東至西分隔住。而呢列牆嘅前面就係一列熟食大牌檔。我冇數過有幾多，有冇20個大牌檔呢？食品可謂多樣化，牛肉粥，油器腸粉、打冷、茶檔、生滚及第粥，雲吞、牛腩麵、糖水，炒粉麵、即炒小菜、已煮好嘅飯菜、燒腊飯……應有盡有。
街嘅北面係一列，一幢一幢嘅樓宇，樓下全部係地舖，有賣米、油嘅雜貨舖，上海雜貨嘅南貨鋪、豆腐舖、賣豬牛羊嘅肉食公司等同街市有關嘅舖頭。亦有燒腊、冰室等食肆。
喺舖位之前行人路邊，有一列固定小販檔口。正正嘅路中間亦擺滿走鬼嘅小販，再加上買餸嘅人，你話呢條街有幾繁忙呢！如果喺買餸嘅繁忙時間要由街頭行到街尾，一定要好多時間。而且地上佈滿垃圾，污泥，漬水。我著住膠拖鞋行過羅素街，成對腳，小腿都佈滿汚泥。
到我18歲嗰年，啊爸話我大個仔嘞，所以租多一間房。呢間房嘅窗口就正對羅素街及電車厰。就喺我窗口樓下，日間擺滿賣生果嘅小販，黃昏開始就有熟食推車檔，炸大腸、煎釀三寶，冷天時有糯米飯，牛丸麵等。再加上粥味、蒸腸粉，油炸鬼嗰鑊大油所飄嚟嘅氣味，十分多姿多彩。
晚上食完飯冇耐，嗰時當紥，又覺肚餓，我一定攞一個大湯碗，有咁大得咁大，落去大牌檔，買一碗細牛，同埋炸两打包。用個大碗嚟買，粥佬會比多啲粥。
有人問，點解叫炸两，有冇炸一？係有嘅，炸两嘅正名喺「一炸两腸」即一條油炸鬼，分開兩半，每半條用一條腸粉包住，即共用兩條腸粉。「炸一」就係成條油炸鬼比一條腸粉包住。而家造唔到炸一，原因喺腸粉唔夠闊，包唔晒成條油炸鬼。咁點解又唔夠闊？因為以前一底腸粉只一下，造出兩條腸粉，而家要三下，造出4條腸粉。
有一件事發生喺羅素街，我一定要講，但唔講名。70年代初有一晚，連埋我，共兩男一女去羅素街食糖水宵夜。個女仔食食吓糖水（紅豆沙？）撈到一隻烏蠅！佢即刻冇晒癮，當然唔再食啦。個男仔（唔係我）話「烏蠅啫，冇嘢喎！」二話不說，用匙羹撈起烏蠅連糖水，嗗聲吞咗落肚……。佢嘅動機，至今仍然係一個謎！
電車夜晚返厰，都要經過我嘅窗前，有冇聽過電車喺轉彎及換軌時鐵車轆同鐵路軌互相磨擦所發出嘅聲音呢？我每日都聽，一直到凌晨2點左右。到凌晨4點第一班電車又開始喇！不過，慣咗係唔會瞓唔著喎。
喺離屋企向利舞臺方向約10個8個舖位，有一間美香園凉茶舖。舖內牆角擺咗一個電話。嗰時屋企冇電話，要打電話比啊珊就要落嚟呢度飲番杯蔗汁，如果電話講得長，就要買多杯喇！
留意下一篇
No comments:
Post a Comment