啊爸喺新鵝頸街市，檔口喺佢左手面
聽我講古（17）鵝頸街市（五）
由啊媽用菜籮或生果紙箱做搖籃將我放喺街市開始，我經歷過多次鵝頸搬街市。主要原因都係條大水沆。
我出世之前嘅變遷，留比歷史家講。50年代街市就係水沆西岸石礐同堅拿道西交畀，南至電車福利大厦，北至電車路。到60年代，呢條大水沆變做暗渠。福利大厦同往羅素街鐵欄杆橋都要坼，工程關係，所有牌檔都要搬走。沿住堅拿道西樓宇下面嘅路邊都劃成攤檔。我哋就搬到而家堅拿道西冠景摟紀安藥行路邊嘅位置。工程完成後（1965年前？），水沆面又變番街市，我記得我哋個檔口就喺登龍街口，應該喺呢個時期屋企搬咗去波斯富街，所以已經唔會再喺街市瞓。不過有時都會喺街市煮食。
唔駛幾年（1968年前後），又搬過。原因係要起堅拿道天橋。當時英美煙草公司已經坼卸咗，變成一個大地盤。英美煙草公司就係今日嘅永德大厦（被堅拿道西、灣仔道、寳靈頓道同霎西街包圍住，老囉頭曾住過呢度）。記憶中嘅英美係一座暗紅色磚砌嘅建築物，據我啊爸講，工人返工放工時，都會响〝啤臣〞，但我就冇印象。
我哋個檔口就搬到堅拿道西好近灣仔道口。呢度，有幾個小故事可以講。
我哋喺呢度收飬咗一隻唐狗。每日啊爸去菜欄時，隻狗都搖頭擺尾咁跟佢去到電車路至番轉頭。隻狗夜晚自己喺檔口瞓，自己管理能力極高，完全唔駛點理。一日，有個狀似白粉佬嘅人問我啊爸，想話買我哋隻狗。我哋梗係唔會賣啦！冇耐，有一日早上開檔，隻狗失咗踪，此後永遠都見唔番。我哋懷疑係呢個白粉佬夜晚偷咗隻狗。如果好好地對佢都算啦！如果當三六咁，鬼唔望食死你個白粉佬！
我哋有檔口，理應唔駛點走鬼。但係開起檔嚟，個個都有咁出擺咁出嘅啦。一走起鬼嚟，都要將擺出去嘅收番入格仔內。有一次，收唔切，咁啊爸就拉個正着。當然求情叫比個機會啦！小販隊話，不如咁啦，你執些少貨，用籮蓋装住（作為呈堂證物），比你個仔（即係我），當係拉佢。因為一來，啊爸唔駛番差館落案，即係繼續揾＄﹔二來，告細路都罰得輕啲，唔駛破咁多財。呢啲就係無形嘅規則，大家都留番啲餘地比對方可以走盞。
各位，你試過比人拉未？就係呢次，我應該未夠12歲，比人喺堅拿道西拉咗，坐豬籠車連同證物一併車番灣仔差館，落案控告無牌賣嘢同阻街之罪。唔記得幾時之後，我去維園側铜鑼灣地方法院，裹面有兒童法庭受審。我坐咗入去等叫名，大人叫我個名，佢話，嚤囉仔，而家告你幾時幾日，喺邊度無牌擺賣兼阻街，你認唔認罪？我認。
大人又問，你有冇嘢講？
我冇嘢講！
大人判案, 好，而家罸你5蚊雞，出去比錢、next！
咁我又有多些少特別啲嘅人生經驗喇！
隔籬檔口係賣鹹魚嘅，檔主叫盲公，佢唔係盲人，但顧名思義，佢都係眼〝懵懵〞，睇唔真嗰隻。可能鍾意飲酒，唔係唐唐嗰隻紅酒，而係珠江橋牌玉冰燒﹔所以飲到眼都〝懵〞埋。我有時會喺檔口炒飯食，佢經常讚我炒飯炒得香。不過到而家，我仍然剩係識炒飯。
堅拿道天橋起好後，街市又搬番去水沆頂，如今變成天橋底。呢次檔口近住羅素街。雅健幾次大裝修，都係喺呢段時期。又有幾個小故事可以講。
啊爸忽然鍾意養雀，都係一隻兩隻咁。養過海南了哥，鍾意食辣椒仔。養過白鸚鵡，即係澳洲成天都係嗰隻。隻鸚鵡個咀十分勁，佢乜都咬，所以要成日檢查腳鍊有冇咬爛。夜晚會帶番屋企。我瞓上格牀，我啲黑膠碟就擺喺牀頭，隻鸚鵡居然可以咬到我啲唱片。有幾隻比佢咬過嘅唱片，而家重喺屋企。
雅健大裝修時，會煮大鑊飯。有次由賴子良負責買餸，唔知係我嘅定係佢嘅主意，話要去我啊爸個檔口買菜。我即刻寫咗張字條﹕「來人是我老死，請計佢平啲」，重簽埋名。佢真係帶埋張紙去啊爸檔口買菜！夜晚我番屋企，啊爸比番張字條我睇，佢笑笑口咁話﹕「睇你寫啲乜嘢！」我啊爸係玩得嘅人。
重要搬多一次，呢次係最後一次嘞。市政局有政策要逐步將街邊小販搬晒上街市大厦，咁好彩（或不辛）鵝頸街市係全港第一個咁做嘅地方。而街市原址天橋底就變成巴士站直到今日。
搬街市係咁嘅，所有天橋底及鄰近乾濕牌檔及熟食大牌擋，都要搬入街市大厦，位置分佈係靠投標，嗰時啲人唔識圍標，真係真金白銀咁去投，所以啲租就谷到好貴。搬咗入新街市，啊爸先至發覺佢唔識搭扶手電梯，咁經過些少時間操練吓，都ok嘅。不過，啊爸都唔係交咗好耐租。因為冇耐，啊爸驗出有肺癌，從此佢就正式退出江湖喇。
而至此，露天街邊式嘅鵝頸街市亦喺史冊上劃上句號喇。
Lily at 05/11/2011 08:59 am comment
what a detailed a touching memory!!!!!!!!!!!!!! has your dog got a name????????????
No comments:
Post a Comment