聽我講古（20）賽馬會官小（二）

聽我講古（20）賽馬會官小（二）

文章日期：05/17/2011 07:18 pm

2011.05.10 聽我講故（20）賽馬會官小（二）

我返下晝學，每日喺檔口食完飯就沿灣仔道行返學。就算早咗到達學校，都唔可以入去，因為上晝班未放學。而佢哋放學由活道正門出入，我哋下晝班學生就要去後門（近東華三院）排隊。唔係親身排隊，而係放書包喺地下排，人就走咗去玩啦！

當時東華三院小學向住賽馬會呢邊有啲屋底嘅空位，係剩餘嘅花崗岩石山，上面住咗個顛佬，一嚿嚿長頭髮，污漕辣撻冇鞋著嗰隻，成日喺度自言自語儍笑，有時作狀追打我哋。最麻煩佢有時露械，嗰度好多女仔跳橡筋繩，嚇到啲女仔雞飛狗走，我哋啲男仔就哈哈大笑。

當上晝班走晒，就開門比我哋。我哋入去有蓋操場，用書包排好隊，又再玩過。直到打鐘，就返去分班排好隊。
排隊係有固定位置嘅。每年開學，先生會幫我哋按高矮、男左女右排成兩行，以後成年都跟呢個排法。由操場上課室及由課室落操場或放學都排住隊行，而且男仔女仔要拖住手仔行。我都好好彩，我拖住嘅都係靚女。我哋男仔成日都係成身臭汗，啲女仔就會行到離行離列。有時又會甩開手，到見到先生時再拖番。如果唔想拖手仔，又可以勾住手指尾。

每日都有兩個小息，男仔多數都係跑跳追逐之類，如兵捉賊。參加者用點指兵兵方式分成兩隊，口訣係「點指兵兵，點著誰人做大兵；點指賊賊，點著誰人做大賊」最後兩人就叫「上兵下賊」。又有十字界豆腐、猜皇帝等。女仔就會跳橡筋繩，跳飛機等。有時低年班同高年班一齊玩「捉大牛龜」。

學校有風紀維持秩序。風紀由先生指派，執勤時戴住臂章，非常威風。佢哋有權捉學生去見先生，頑皮學生好似我咁就成日被人罸，所以有時行過風紀身邊，我地會話：「今日風景（紀）唔多好噃」。做其啊Ｑ。

我嘅小學記憶十分快樂，就係玩玩玩玩玩！上堂玩，小息玩，放學玩。似乎唔係點駛做功課。不過，快樂係有代價嘅。

下一篇講吓罸。